Әлеуметтік желілерде Антикор төрағасының атын жамылған аккаунттар анықталды

АНКАРА.KAZINFORM — Сыбайлас жемқорлыққа қарсы қызмет әлеуметтік желілерде Агенттік басшылығы мен қызметкерлерінің атынан жалған аккаунттар мен парақшалар ашуды доғармай отырған алаяқтар туралы тағы да ескертті. 

Агенттіктің мәліметінше, Facebook әлеуметтік желісінде Сыбайлас жемқорлыққа қарсы іс-қимыл агенттігінің Төрағасы Асхат Жұмағалидің атынан ашылған жалған парақша анықталған.

— Бұл Төрағаның жеке парақшасы емес екенін ескертеміз. Қазіргі уақытта мұндай жалған парақшаны бұғаттау жұмыстары жүргізіліп жатыр, — деп мәлімдеді агенттіктен.

Сыбайлас жемқорлыққа қарсы қызмет Төрағасының ресми парақшасы келесі сілтемеде: Facebook, Instagram.

— Төрағаның атын жамылып, күдік туғызатын мазмұндағы өзге парақшалар мен аккаунттарға сенбеулеріңізді сұраймыз. Мұндай жағдайлар мен хабарламалар анықталған жағдайда Қазақстан Республикасының Құқық қорғау органдарына дереу хабарлауларыңызды сұраймыз, — делінген хабарламада.

Еске сала кетейік, бұған дейін жүргізуші куәлігін 10 сәуірге дейін ауыстыру керек деген фейк ақпарат тараған еді.