Алмалы ауданының «Верный» ПИК жылу маусымына дайындықты бірінші болып аяқтады

 АЛМАТЫ. Шілденің 2-сі. ҚазАқпарат /Жанар Шағалақова/ - Алматы қаласының  Алмалы ауданындағы «Верный» пәтер иелері кооперативі           (ПИК)  қысқы жылу маусымына дайындықты бірінші болып аяқтады. Бұл туралы бүгін  «Жылу маусымына даярлық» деп аталған кооператив өкілдерінің тұрғындарымен кездесуінде айтылды, 

 деп хабарлайды ҚазАқпарат.

«Бізге қарайтын   аумақта 765 пәтерлі 16 көп қабатты тұрғын үй бар.  Тұрғындардың саны  1 358 адамды құрайды.  Бұл үйлердің көбі 1957-1962 жылдары салынған. Осыған қарамастан тұрғын үй иелері жылу маусымы кезінде бірде-бір рет шағымданған жоқ. Биыл біз 16 үйдің 28 элеваторлы тораптарын күрделі жөндеуден өткіздік. Сондай-ақ үйдің шатырларына да  біраз жөндеу  жұмыстарын жасадық.  Мәселен  380 мың теңгеге Абылай хан көшесіндегі 74-ші үйдің 1 200 шаршы метрлік  шатыры жөнделді»,- дейді «Верный» ПИК-інің төрағасы Магарам Сафаров.  Ол аталған жиында  тұрғындарға  2009-2010 жылғы  жылу маусымына дайындық туралы есеп берді. Оның айтуынша,        «Верный» ПИК биыл алдағы жылу маусымына әзірлікті қалада ең бірінші болып   аяқтап отыр.