Алматы-Бішкек жолында әйел ер адамды жүк көлігінің астына итеріп жіберді: Жәбірленуші көз жұмды
Алматы-Бішкек тасжолында әйел ер адамды жүк көлігі астына итеріп жіберді, деп хабарлайды Kazinform.
Оның видеосы әлеуметтік желіде тарады.
Алматы облыстық полиция департаментінің мәліметінше, оқиға 30 қазан күні болған
«Қарасай аудандық полиция басқармасына Алматы-Бішкек тасжолында Volvo жүк көлігі жүргізушісі белгісіз ер адамды қағып кеткені туралы хабар түсті. Тексеру кезінде әлдебір әйел ер адамды жүк көлігі астына итеріп жібергені анықталды», - деп хабарлады полициядан.
Аталған дерек Қылмыстық кодекстің 99-бабы 1-бөлігі бойынша аудандық полицияда тіркелді.
«Жедел іздестіру шаралары барысында 1963 жылы туған әйел ұсталып, уақытша ұстау изоляторына қамалды. Қазіргі уақытта қажетті сараптама тағайындалып, тергеу амалдары жүргізіліп жатыр», - деп атап өтті департаменттен.
