Алматы халықаралық әуежайында туристерге естелік сыйлықтар табыс етілді
АЛМАТЫ. KAZINFORM - Қазақстан халқының бірлігі күнін тойлау аясында Алматы қаласы туризм басқармасы ҚР Ұлттық қауіпсіздік комитеті Шекара қызметінің Алматы қаласы шекаралық бақылау басқармасымен және Алматы халықаралық әуежайымен бірлесіп, «Қонақтарға кәдесый» дайындады.
Халықаралық терминалға келген әрбір жолаушыға қаланың ұлттық ою-өрнектері мен мәдени көрікті жерлері бейнеленген стикерлер түріндегі символдық сыйлық ұсынылды. Шара 6 мыңнан астам жолаушы тасымалдайтын 30-ға жуық халықаралық рейстерді қамтыды.
Қалалық туризм басқармасы атап өткендей, Алматы әртүрлі және көп мәдениетті атмосферасының арқасында әлемнің түкпір-түкпірінен келген саяхатшылар үшін тартымды қала.
Акция туристерді тартуға және елдегі алғашқы жағымды әсерді («travel experience») қалыптастыруға, халықаралық қонақтардың қала тарихы мен мәдениетін құрметтеуіне және терең түсінуіне бағытталған.
«Алматы қаласының этникалық құрамының алуан түрлілігін ескере отырып, қазақтар (62,4%), орыстар (20,5%), ұйғырлар (5,4%), корейлер (1,8%), татарлар (1,5%), украиндар (1%), әзірбайжандар (0,9%) және тағы басқа ұлттар үшін бұл іс-шараны өткізу мәдениетаралық өзара іс-қимылды нығайтуға ықпал етеді»,- деп атап өтті қалалық әкімдіктен.
