Алматы қаласында қанша соғыс ардагері тұрады

АЛМАТЫ. KAZINFORM – Қазір Алматыда 23 соғыс ардагері бар.

Алматы әкімдігінің мәліметінше, Жеңістің 80 жылдығына орай әрбір соғыс ардагеріне мемлекет тарапынан 5 млн теңгеден сыйақы беріледі. Сондай-ақ осы санатқа теңестірілген 1457 ардагер тұрады.

Екінші дүниежүзілік соғыс қатысушыларына әлеуметтік қолдаудан бөлек, ай сайын 6,5 АЕК немесе 25558 теңге арнаулы мемлекеттік жәрдемақы төленеді.

Сонымен қатар, қаланың жоғары оқу орындары мен колледждері мен мектептерінде патриоттық іс-шаралар, жауынгерлік іс-қимыл ардагерлерімен кездесулер және тақырыптық «Ерлік сабақтары» өтіп жатыр.

Ресми дерекке сүйенер болсақ, соғыс жылдары майданға 1,3 млн қазақстандық шақырылды. Қазақстанның 100 мыңнан астам сарбазы жауынгерлік ордендермен және медальдармен марапатталды, 500-ден астам адам Кеңес Одағының Батыры атанды.

Бұған дейін Президент Телерадиокешені соғыс ардагері Жақан Сейсебаевты ғасыр жасымен құттықтаған болатын.