Алматы облысы әкімдігі 19 млн теңгеге комикс түсірмек

ҚОНАЕВ. KAZINFORM — Алматы облыстық дін істері басқармасы экстремизмге қарсы күрес пен дәстүрлі құндылықтарды дәріптеу үшін арнайы комикстер түсірмек. Бұл ақпарат мемлекеттік сатып алу порталында жарияланды. 

Жоба құны — 19 701 000 теңге. Тапсырыс беруші — Алматы облыстық дін істері басқармасы.

Техникалық сипаттамаға сәйкес, мақсат — оқырмандарды қазақ тарихындағы танымал тұлғалармен таныстыру. Олардың қатарында — батырлар, зиялы қауым өкілдері және басқа да қайраткерлер бар.

Жоба аясында қазақ және орыс тілдерінде кем дегенде 10 анимациялық комикс әзірленіп, жарыққа шығады. Олардың әрқайсысы кемінде 15 беттен тұруы керек. Баспа нұсқада да, электронды форматта да қолжетімді болуы шарт.

Сондай-ақ, әр комикстің дизайны, форматы мен мазмұны тапсырыс берушінің келісімімен бекітіледі. Кемінде 1000 дана басылып шығуы тиіс. Ал әр жеке комикстің таралымы 100 данадан аз болмайды.

Комикстердің сценариі тек дәстүрлі құндылықтарды ғана емес, діни экстремизм мен терроризмге қарсы күрес тақырыптарын да қамтуы тиіс.

Бұдан бөлек, оқырманға патриоттық сезім, туған елге деген махаббат, қазақ фольклоры мен тарихи оқиғаларға қызығушылық дарыту көзделіп отыр.

Сценарий мақұлданғаннан кейін, қазақ және орыс тілдерінде 10 видеокомикс дайындалады.

Жобаның аяқталу мерзімі — 15 желтоқсан 2025 жыл

Еске салайық, былтыр елде терроризмді насихаттау және экстремистік ұйымдарға қатысу сияқты 85 қылмысты анықталды.