Алматы облысынан Батыс Қазақстан облысына 130 тонна гуманитарлық көмек жөнелтілді

Алматы облысы әкімдігінің мәліметінше гуманитарлық көмектің 100 тоннасы темір жол арқылы, 30 тоннасы «Алтын орда» сауда базары ұйымдастырған жүк көлігімен жөнелтілді. 

Сондай-ақ, облыс кәсіпкерлерінің қолдауымен арнайы қорға 30 млн теңге қаржылай көмек аударылды.

«Бүгін су тасқыны болған аймақтарға көмек көрсету мақсатында облыстан 15 волонтер аттанатын болады. Гуманитарлық көмекті жинауға облыстың 9 ауданы, 1 қаласы, кәсіпкерлер, этномәдени бірлестіктердің өкілдері, «AMANAT» партиясының мүшелері, Қазақстан Мұсылмандары діни басқармасының облыстық филиалы мен қайырымды жандар өз үлесін қосты», - деп хабарлады Алматы облысы әкімдігінің баспасөз қызметі.

Гуманитарлық көмекті жинақтау үшін құрылған «Күшіміз-бірлікте» волонтерлар штабының жұмысын ұйымдастыруға кәсіпкерлік, жұмылдыру дайындығы, ішкі саясат басқармалары, баспасөз қызметі, Қонаев қаласының әкімдігі қолдау көрсетті. Штаб жұмысына 300 ден астам волонтер қатысты.

Еске салсақ, бұған дейін алматылықтар Атырау облысына гуманитарлық көмек жіберген болатын.