Алматы облысында кәсіпорындар суармалы су тарифтерін негізсіз көтерген — Прокуратура

АЛМАТЫ. KAZINFORM — Алматы облысының прокуратурасы облыстың су шаруашылығы кәсіпорындарының қызметін тексеру нәтижесінде, суармалы су тарифтерінің негізсіз көтерілу деректерін анықтап, ауыл шаруашылығы өндірушілеріне келтірілетін шығынның алдын алды. Бұл туралы прокуратураның баспасөз қызметі мәлім етті. 

«Талдау барысында Талғарирригация, Балқаширригация, Көлсайирригация және Үшқоңырирригация ұйымдарының су тасымалына, су беру құрылыстарын күтіп ұстауға және салық аударымдарына жұмсалатын шығындарды асыра бағалауы себебінен түпкі пайдаланушылар үшін суармалы судың құны негізсіз көтерілгені анықталды», — делінген хабарламада.

Прокуратураның қадағалау актісі аясында өтемдік тарифтер енгізіліп, 1 м³ суармалы судың құны 38%-ға төмендетілді. Бұл шараның нәтижесінде облыстың 1300-ден астам ауыл шаруашылығы өндірушілерінің құқықтары қорғалды және шығындардың өсуі жағдайында олардың ұстанымдары нығайтылды.

Тексеру қорытындысы бойынша кінәлі тұлғалар тәртіптік жауапкершілікке тартылды.

Бұған дейін хабарланғандай, Ұлытау облысында 218 млн теңге мемлекетке қайтарылды.