Алматы облысында өртенген көлік ішінен мәйіт табылды

ҚОНАЕВ.KAZINFORM - Алматы облысының полициясы бұл дерек бойынша қылмыстық іс қозғады.

Желідегі мәліметке сәйкес, Алматы облысында өртенген көлік ішінен адамның жанып кеткен мәйіті табылды. Оны өзге ер адам балғамен ұрып өлтіріп, кейін көлікпен бірге өртеп жіберген. 

Алматы облысының Полиция департаменті кісі өлтіру фактісі болғанын растады.

— Жедел-іздестіру іс-шаралары барысында 43 жастағы күдікті ұсталып, уақытша ұстау изоляторына қамауға алынды. Қазіргі уақытта қылмыстың барлық мән-жайлары анықталып жатыр, — деп хабарлады облыстық полиция департаментінен.

Еске салайық, бұған дейін Алматы облысында айыпталушы сот залынан қашып кеткенін жазғанбыз.