Алматы облысының тауында қар көшкіні жолды жауып қалды
АЛМАТЫ. KAZINFORM – Алматы облысында қар көшкіні жүрді. Салдарынан облыстық маңызы бар Түрген-Батан-Асы обсерваториясы жолы жабылды.
Алматы облысы әкімдігінің мәліметінше, Еңбекшіқазақ ауданында 9 ақпан күні таңғы сағат 11:35-те Түрген-Батан-Асы обсерваториясы бағытындағы облыстық автожолдың 24 шақырымында өздігінен қар көшкіні жүріп өтті. Оған тау беткейлеріндегі қар жамылғысының тұрақсыз жағдайы себеп болған. Қар көшкінінің жалпы көлемі анықталып жатыр.
Оқиға орнына «Қазселденқорғау» мемлекеттік мекемесінің қызметкерлері мен құтқарушылары шықты.
«2024 жылдың 1 мамырына дейін 15-ші шақырымнан бастап жолдың осы учаскесінде қозғалыс жабық екенін ресми түрде хабарлаймыз. Оқиғаның салдарын жою жұмыстары басталып кетті, барлығы ретке келтіріледі. Айта кетейік, зардап шеккендер жоқ, Алматы облысы бойынша алдын алу шаралары жүргізілуде», - деп хабарлады әкімдіктен.
