«Алматы-Өскемен» автомагистралінің Жетісу облысындағы бөлігінде жол салу жұмыстары жанданды

ТАЛДЫҚОРҒАН. KAZINFORM – Күрежолдың құрылысы 2019 жылы басталды. Талдықорғаннан Шығыс Қазақстан облысының шекарасына дейінгі аралық 300 шақырымнан асады. 2019 жылдан бері соның 214 шақырымында жол салу жұмыстары аяқталды. 

«ҚазАвтоЖол» АҚ ҰК ОФ директорының орынбасары Жасұлан Қалтаев қазіргі кезде көлік қатынасы жақсарып, барыс-келіс жеңілдегенін айтады. 

– Биыл бірінші тоқсанға келетін болсақ, 21 жол апаты болған. Өткен жылдың бірінші тоқсанымен салыстырсақ, 25 пайызға төмендеді. Жолшылар тарапынан қауіпсіздікке бағытталған іс-шаралар бойынша жол белгілерін орнату, жолды таңбалау бойынша катафоттарды ауыстыру, тосқауыл қоршауларды ретке келтіру бойынша жұмыстар жүргізіліп жатыр, - дейді Жасұлан Қалтаев.

Былтыр Жетісу облысындағы «Алтынемел» асуы жөнделді. Биыл «Жаркент-Қорғас» жолының 32 шақырымын қалпына келтіру жоспарланып отыр. 

– Қазір жол жақсы, тегіс. Мына тұрақтары бар. Екі-үш сағатта жетіп аламыз. Күрежолдың қалған 100 шақырымына асфальттің үшінші қабаты төселе бастады. Сонымен қатар шеткі қоршауы, жарықшамдары мен жол белгілері орнатылып жатыр, - дейді Өзбекстан азаматы Рустамжан Есжанов.