Алматы тауларында жасанды жолмен қар көшкіні жүргізілді

АЛМАТЫ. KAZINFORM – «Шымбұлақ» тау шаңғы курорты базасының аумағында қар көшкінін алдын ала жүргізу жұмысы жүргізілді.

Төтенше жағдайлар министрлігінің баспасөз қызметінің мәліметіне сүйенсек, Алматы тауларында температураның күрт өзгеруіне, жылымыққа және желге байланысты көшкін жүру қаупі артты.

– ТЖМ Қазселденқорғау қызметкерлері құтқарушылармен бірлесіп «Шымбұлақ» тау шаңғы курортында 3200 метр биіктікте профилактикалық қар түсіру жұмысын жүргізді. Жүргізілген жұмыстардың нәтижесінде 3500 текше метр қар массасы түсірілді, – деп хабарлады ТЖМ.

Құтқарушылар тұрғындарға таулы аймақтарда қар көшкіні қаупі әлі де барын айтып, барынша сақ болуға шақырды.

Еске салсақ, бұған дейін Алматы облысының тауларында 17-23 ақпан аралығында аралығында көшкін қаупі сақталатыны туралы жазған едік.

Сондай-ақ өңірде қар көшкіні қаупіне байланысты бірнеше автожол көктемге дейін жабылды.