«Алматы жастары» бағдарламасына 1 маусымнан бастап өтінім қабылданады
АЛМАТЫ. KAZINFORM – Алматыда жастарға арналған жеңілдетілген тұрғын үй несиесін ұсынатын «Алматы жастары» бағдарламасына биыл 1-15 маусым аралығында өтінім қабылданады.
Коммуналдық инфрақұрылымды дамыту және тұрғын үй инспекциясы басқармасының мәліметінше, өтінімді kezekte.kz порталындағы «Тұрғын үй сервистері» бөлімінде орналасқан «Almaty Jastary» сервисі арқылы 1 маусым сағат 09:00-ден 15 маусым сағат 18:00-ге дейін жолдауға болады. Жүйеге кіру үшін электрондық цифрлық қолтаңба (ЭЦҚ) қажет.
Бағдарлама аясында қатысушыларға мынандай мүмкіндіктер ұсынылады:
– несие көлемі 20 миллион теңгеге дейін;
– жылдық мөлшерлеме – 5%;
– бастапқы жарна – 10%;
– бастапқы және қайталама нарықтан баспана сатып алуға мүмкіндік беріледі.
Жобаға Алматы қаласында тұратын 35 жасқа дейінгі жастар қатыса алады.
Қатысушыларға қойылатын негізгі талаптар:
– Алматы қаласында кемінде бір жыл тұрақты тіркеуде болу;
– кейінгі бес жылда үміткердің және оның отбасы мүшелерінің атында тұрғын үйдің болмауы;
– Алматыда кемінде алты ай ресми жұмыс өтілі мен міндетті зейнетақы аударымдарының болуы.
Бағдарлама денсаулық сақтау, білім беру, мәдениет, спорт салаларының қызметкерлеріне, ЖОО мен ғылыми-зерттеу институттарының мамандарына, журналистерге, әлеуметтік сала өкілдеріне, құқық қорғау органдары мен коммуналдық қызмет қызметкерлеріне, сондай-ақ «Жұмыс істейтін жастар» бағдарламасының жалға алушыларына арналған.
Бағдарлама туралы толық ақпаратты kezekte.kz сайтындағы «Тұрғын үй сервистері» бөлімінен табуға болады. Байланыс телефоны: +7 (727) 225-14-57.
Еске салайық, 2025 жылдан бастап «Алматы жастары» тұрғын үй бағдарламасы бойынша несиелендіру мөлшері 18 млн теңгеден 20 млн теңгеге дейін ұлғайтылды.
