Алматыда 260 шақырым су құбыры желісі салынып, қайта жаңғыртылады
АЛМАТЫ. KAZINFORM – Биыл Алматы қаласының тұрғындарын сумен қамту деңгейі 99,6%-дан 99,9%-ға дейін артады.
Биыл 190 км желі салуға және жаңғыртуға 23 келісімшарт жасалып, қазір 16,3 шақырым су желісі салынды. Ақсай» өзеніндегі су алатын құрылғының құрылысы 85%-ға орындалды. Ал «Ерменсай» нысаны бойынша мердігерді таңдау үшін 2025 жылы 9 сәуірде байқау жарияланды.
– Суды үнемді пайдалану мақсатында жыл басынан бері 39 мың жеке су есептегіш құрылғы орнатылды, оның ішінде 8,9 мыңы – сәуірде. Бұл есептегішпен жабдықтау деңгейін 2024 жылғы 67%-дан 2025 жылдың сәуірінде 75%-ға дейін жеткізді. Жыл соңына қарай бұл көрсеткіш 90%-ға жетеді деп жоспарланып отыр. Жалпы биыл тұрғындарды сапалы сумен қамтамасыз ету үшін 260 км сумен жабдықтау желілері салынып, реконструкцияланады, – делінген қала әкімі Ерболат Досаевтың 1-30 сәуір аралығындағы Президентке берген есебінде.
Айта кетейік, 2025 жылдың сәуір айында Алматы әкімдігі әзірлеген іс-шаралар жоспарында Президент Қасым-Жомарт Тоқаевтың тапсырмаларын орындауға арналған қаланы тұрақты дамытуға бағытталған 41 іс-шара қарастырылған.
– Мемлекет басшысы үшін тапсырмалардың орындалу барысы туралы есеп белгіленген кестеге сәйкес қалыптастырылады және ұсынылады, - деп атап өтті әкімдіктен.
Еске салайық, Президент Қасым-Жомарт Тоқаев Алматыға жұмыс сапары кезінде қала әкімі Ерболат Досаевты қабылдап, шаһарды жарықтандыру, пәтерлерге суды уақытылы және толық беру, көшелер мен аулаларды абаттандыру бойынша бірқатар тапсырма берген болатын.
