Алматыда 288 мүмкіндігі шектеулі адам техникалық оңалту құралымен қамтылды
АЛМАТЫ. KAZINFORM – Биыл мүгедектігі бар 288 алматылықты оңалтудың инновациялық техникалық құралдарымен қамтамасыз ету үшін жергілікті бюджеттен 1 396 550 мың теңге бөлінді.
Алматы қаласы әкімдігінен атап өткендей, 2023 жылы мемлекеттік сатып алу арқылы 1 390 млн теңгеге 433 адам оңалтудың инновациялық техникалық құралдарымен қамтамасыз етілді. Атап айтсақ, 150 протез, 200 арба, 76 сөйлеу процессоры және 7 сүйек өткізгіш есту аппараты.
«2024 жылы мүгедектігі бар 288 адамды оңалтудың инновациялық техникалық құралдарымен қамтамасыз ету үшін жергілікті бюджеттен 1 396 550 мың теңге бөлінді. Осылайша, 208 адамға 804 050 мың теңгенің арбасы берілді, 60 адамның протездік-ортопедиялық құралдарына 472 500 мың теңге жұмсалды, 20 адамның сөйлеу процессоры, сүйек өткізгіштігі бар есту аппаратына 120 000 мың теңге жұмсалды», - деп хабарлады әкімдіктен.
Арнайы жабдық алғандардың бірі Бауыржан Мекенбайұлы, мүгедек арбасының сапасы жоғары екенін айтты.
«Мен мүгедектер арбасына өте риза болдым. Арбаның дизайны өте жоғары деңгейде жасалған, материалдардың сапасы да жақсы. Орындық өте ыңғайлы және жайлы, жұмсақ жастықтары бар, жүріп-тұруға өте ыңғайлы. Арба жеңіл әрі оңай бұрылады, тіпті тар бөлмеде де басқару оңай. Мұндай арбалар өмір сапасын жақсартуға көмектесіп, күнделікті өмірде ыңғайлылық пен жайлылықты қамтамасыз етеді» - деді Бауыржан Мекенбайұлы.
