Алматыда 45 мың орындық жаңа стадион салынады: жоба қай кезеңде

АЛМАТЫ. KAZINFORM — Алматыда алдағы жылдары 45 мың көрерменді бір мезетте қабылдай алатын жаңа футбол стадионы бой көтермек. 2026 жылдың ақпан айының басындағы жағдай бойынша жоба әзірлік кезеңінде тұр. 

Алматы құрылыс басқармасы Kazinform агенттігінің ресми сауалына берген жауабында қазіргі уақытта нысанның жобалық-сметалық құжаттамасы әзірленіп жатқанын хабарлады.

Басқарма мәліметінше, стадион құрылысына Медеу ауданындағы Құлжа тасжолы бойынан жер телімі бөлінген. Спорт нысаны халықаралық талаптарға тегіс сай болады.

— Стадион UEFA-ның IV санат талаптарына сәйкес салынады. Жоба аясында табиғи шөп төсеніші бар футбол алаңы қарастырылған. Сондай-ақ мыңнан астам автокөлікке арналған тұрақ та қарастырылған. Жобалық-сметалық құжаттама халықаралық стандарттар мен Қазақстан Республикасының құрылыс нормаларына сәйкес әзірленіп жатыр, — деді Алматы құрылыс басқармасы басшысының орынбасары Диас Заманбеков.

Жанкүйерлердің негізгі сұрағы — «Жаңа стадион қашан пайдалануға беріледі?» Бұл күн де алыс емес.

— Құрылыс-монтаж жұмыстары 2027 жылдың IV тоқсанында аяқталады деп жоспарланып отыр. Ал нысанның нақты құны жобалық-сметалық құжаттама мемлекеттік сараптамадан өткеннен кейін белгілі болады, — деп мәлімдеді Диас Заманбеков.

Еске салайық, бұған дейін Алматыда UEFA-ның IV санат талаптарына сай келетін жаңа стадионның сыйымдылығын 35 мың орыннан 45 мыңға көбейту мәселесі қарастырылып жатқанын жазғанбыз.