Алматыда әлеуметтік, медициналық және білім саласы қызметкерлерінің жалақысы өседі

АЛМАТЫ. KAZINFORM — Алматыда қалалық мәслихаттың кезекті XXVIII сессиясы өтті.

Алматы әкімдігі мәслихат депутаттарының алдында 2025 жылға арналған алғашқы нақтыланған бюджеттің жобасын енгізді. Ол бойынша қала басшысының орынбасары Асқар Әмрин білім беру мекемелерінде жұмыс істейтін қызметкерлеріне үстемақы қосуды ұсынды.

Айтуынша, бухгалтерлер, кітапханашылар, психологтар, логопедтер, әлеуметтік қызметкерлер мен техникалық қызметкерлер, оның ішінде еден жуушылар жылдан жылға төмен жалақы алып келеді.

— Бұл бюджет жобасы әлеуметтік қамсыздандыру және білім беру саласының әкімшілік және көмекші персоналына, оның ішінде педагог-психологтарға, сондай-ақ ведомстволық бағынысты әлеуметтік мекемелер қызметкерлеріне жалақыны 30%-ға арттыруды көздейді, — деді Асқар Әмрин.

Сондай-ақ сессия барысында медициналық-әлеуметтік мекемелердің қызметкерлеріне үстемақы беру мәселесі талқыланды. Алматы қаласы Жұмыспен қамту және әлеуметтік бағдарламалар басқармасының басшысы Бауыржан Жаубасов медициналық-әлеуметтік мекемелердің қызметкерлеріне еңбекақы төлеу деңгейі төмен екенін атап өтті.

— Әлеуметтік қызметкерлердің жалақысы төмен болғандықтан әлеуметтік қызметкерлер арасынан білікті мамандардың кетуі байқалады. 7 жылдан 10 жылға дейінгі өтілі бар әлеуметтік қызметкердің жалақысы 240 мың теңге, ұқсас өтілі бар психологтың жалақысы небәрі 170 мың теңге, — деді ол.

Алматы мәслихат әлеуметтік мекемелер қызметкерлерінің лауазымдық жалақыларына 30% мөлшерінде ынталандыру үстемелерін белгілеу туралы ұсынысты қолдады. Соның арқасында 1 632 қызметкер үстемеақы алады.

Еске салайық, бұған дейін педагогтердің жалақысы соңғы бес жылда қалай өскенін жазғанбыз.