Алматыда әуежайына салынған 122 млн теңге айыппұл заңсыз деп танылды
АЛМАТЫ. KAZINFORM - Алматы қаласының прокуратурасы тұрақты түрде маңызды инвестициялық жобаларға қолдау жасалып жатқанын хабарлады.
Қала прокуратурасының мәліметінше, 85 млрд теңгеге жуық инвестиция құйып, 500-ден астам жұмыс орнын ашқан Алматы әуежайының басқарушы компаниясы - «TAV Қазақстан» ЖШС-ына заңсыз айыппұл салынған.
Атап айтқанда, Алматы қаласы Энергетика және сумен жабдықтау басқармасының «Алматы Су» мекемесі сумен жабдықтау мен су бұру қызметтеріне 122 млн қосымша төлем мен айыппұл салған. Түрксіб ауданының прокуратурасы қадағалау актісін енгізіп, заңсыз әрекеттердің жолын кесті. Айыппұл мен қосымша төлемдер жойылды.
- Егер сіз инвестор болсаңыз және жобаңызды іске асыруда мәселе туындаса, онда прокуратура қызметкерімен байланысып, кәсіпкерлер мен инвесторлардың құқықтарын қорғау жөнінде Call-орталығы арқылы (байланыс нөмірі +77017755500) немесе Алматы қаласы прокуратурасының фронт-офисінен (Ю.Померанцев көшесі, 7) құқықтық кеңес ала аласыз, - деп хабарлады прокуратурадан.
Еске салайық, бұған дейін Алматыда 500-ден астам заңсыз сауда орындары мен ойын-сауық аппараты бұзылғанын жазғанбыз.
