Алматыда автобус ішінде жүргізуші әйелді ұрған жолаушының соты кейінге шегерілді
АЛМАТЫ. KAZINFORM – Алматыда № 47-ші бағыттағы қоғамдық көліктің ішінде жүргізуші әйелді ұрған А.есімді жолаушының соты 26 наурызға шегерілді.
А. есімді жолаушыға қатысты ҚР ҚК 293-бабы (бұзақылық) және ҚР ҚК 351-бабы (екі және одан да көп адамның өліміне әкеп соққан көліктің қауіпсіз жұмысын қамтамасыз ететін ережелерді бұзу) бойынша қылмыстық істі Алматы қаласы Алатау аудандық соты кейінге қалдырды.
Еске салайық, өткен жылы желтоқсан айында Алматыда № 47-ші бағыттағы қоғамдық көліктің ішіндегі жолаушы жанжал шығарып, жүргізуші әйелді ұрған. Салдарынан әйел есінен танып, көлікті басқара алмай, аялдамада тұрған бір топ адамды қаққан.
Апат салдарынан 7 адам зардап шегіп, 3 адам қайтыс болды.
Қаза тапқан үш адамның екеуі ерлі-зайыпты ұстаздар болған. Олардың артында 4 баласы қалды.
Автобус жүргізушісі ұсталып, оған қатысты ҚР ҚК 293-бабы (бұзақылық) және ҚР ҚК 351-бабы (екі және одан да көп адамның өліміне әкеп соққан көліктің қауіпсіз жұмысын қамтамасыз ететін ережелерді бұзу) бойынша қылмыстық іс қозғалды.
Сондай-ақ оның екі айға қамауға алынғанын хабарлағанбыз.
