Алматыда кәсіпкерлер көріктендіру төлқұжатының ережелерін сақтауға міндеттелді

АЛМАТЫ. KAZINFORM - Алматыда жаңа көріктендіру ережелері аясында 6 039 бизнес нысанды төлқұжаттау жұмыстары аяқталды.

1 сәуірден бастап кәсіпкерлер көріктендіру төлқұжатының ережелерін сақтауға міндетті. Көріктендіру төлқұжатының талаптарының орындалуын аудан әкімдіктерінің көріктендіру және экология бөлімі бақылайды. 

Жаңа талапқа сәйкес, әрбір бизнес өкілі көріктендіру төлқұжатын алып, оған тиесілі аумақтың тазалығы мен тәртібін сақтауы қажет. Бұл талап меншік нысанына қарамастан барлық кәсіпкерге қатысты. 

— Ғимарат иелері, сондай-ақ ПИК, МИБ, ҚС сияқты заңды және жеке тұлғалар мен жер пайдаланушылар аумағының тазалығын қамтамасыз етіп, ғимарат қасбеттерінің уақтылы жөнделуі мен сырлануын қадағалауға тиіс. Ал қыс мезгілінде ғимарат иелері тұрғындар мен жалға алушыларды қар мен мұзды тазалау жұмыстары туралы алдын ала хабардар етуі керек, - деп түсіндірді әкімдіктен.

Талапты бұзған кәсіпкерлер Қазақстан Республикасының Әкімшілік құқық бұзушылық туралы кодексінің 505-бабы бойынша әкімшілік жауапкершілікке тартылады. Шағын бизнес субъектілері мен коммерциялық емес ұйымдар үшін айыппұл мөлшері — 30 АЕК (117 мың теңге). Орта бизнес субъектілері үшін — 40 АЕК (157 мың теңге). Ірі бизнес субъектілері үшін — 100 АЕК (393 мың теңге). 

Еске салайық, бұған дейін Алматыда ерекше қажеттіліктері бар адамдар үшін 3,1 мың әлеуметтік нысан бейімделетінін жазғанбыз.