Алматыда көпқабатты үйден құлаған екі жасөспірім көз жұмды

АЛМАТЫ. KAZINFORM – Алматыда екі жасөспірім қыз көпқабатты үйден құлап, оқиға орнында қайтыс болды. Желіде тараған ақпаратты Алматы қаласы Полиция департаменті растады.

Қалалық Полиция департаментінде бұл жағдай бойынша қылмыстық іс қозғалғанын хабарлады. 

– Бұл дерек бойынша Алмалы аудандық полиция Басқармасы қылмыстық іс қозғады. Оқиғаның себебі мен мән-жайы анықталып жатыр, - деп хабарлады қалалық ПД баспасөз қызметінен. 

Еске салайық, бұған ұқсас қайғылы жағдай Орал қаласында болғанын жазғанбыз. Бір күнде екі бала көпқабатты үйдің терезесінен құлап кетті. 

Сондай-ақ Алматыда көпқабатты үйдің терезесінен құлаған әйелдің бейнежазбасы әлеуметтік желіде тараған болатын.