Алматыда мерекеде тіркелетін өрттің 18 пайызы пиротехникалық заттардан болады

АЛМАТЫ. KAZINFORM – Алматыда жыл сайын жаңа жылдық мереке күндері орта есеппен 11 өрт жағдай тіркеледі.

Алматы Төтенше жағдайлар департаменті басшысының орынбасары Кәрімжан Рахман пиротехниканы пайдалану көбінесе өрт пен жарақат алуға себеп болатынын атап өтті.

– Жыл сайын Алматыда жаңа жылдық мереке кезінде орта есеппен 11 өрт оқиғасы орын алады, олардың шамамен 18%-ы пиротехникалық бұйымдармен байланысты. Соңғы бес жылда осындай себеппен 57 өрт тіркелді. Біздің басты міндетіміз — осындай жағдайлардың алдын алу және қала тұрғындарын қорғау, – деп атап өтті Кәрімжан Рахман.

Жедел жәрдем қызметі директорының орынбасары Андрей Ложкиннің дерегінше, былтыр 18 адам, оның ішінде 11 бала пиротехниканы дұрыс пайдаланбау салдарынан түрлі дене жарақаттарын алған.

— Осыған байланысты мен ата-аналарды мереке кезінде балаларды мұқият бақылауға шақырамын.Біз балаларды отшашулар мен петардаларды ұшыруға жол бермеуді ұсынамыз. Бұл қайғылы жағдайлардың алдын алады, — деді спикер.

Бұған дейін хабарлағанымыздай, пиротехникалық бұйымдарды заңсыз сатқандарға 40 млн теңге айыппұл салынды.