Алматыда нөсерлі жаңбыр күтіледі

Алматы
Фото: Александр Павский / Kazinform

АЛМАТЫ. KAZINFORM – Алматыда бүгін күндіз нөсерлі жаңбыр күтіледі. Таулы аймақта жауын-шашын мөлшері 28 мм-ге дейін жетті.

Бұған қаланың коммуналдық қызметі тас-түйін дайын. Жауын-шашын кезінде су басудың алдын алу және судың кедергісіз ағып кетуі үшін мотопомпалармен, багрлермен және басқа да шанц құралдарымен жабдықталған 52 жедел мобильді бригаданың кезекшілігі ұйымдастырылады. 2,5 мың қап құм дайындалды. Күндізгі уақытта жауын-шашын кезінде барлығы 465 бірлік арнайы техника, 28 мотопомпа және 810 жұмысшы жұмылдырылады.

«Қазгидромет» РМК-ның дерегінше, 30 маусымда қалада 11 мм-ге дейін жауын-шашын, ал, Кіші Алматы шатқалында 28 мм-ге дейін жауған қатты жаңбырдан кейін маусым айындағы жауын-шашынның жартысына жуығы (59 мм) түсіп, қатты желдің салдарынан құлаған бұтақтармен, қоқыс, лаймен бітелген арық желілері мен жол астындағы өткелдер 320 жұмысшының және 92 бірлік арнайы техниканың күшімен тазартылды. Түнгі уақытта 210 текше метр қоқыс шығарылды. 

Арықты аршу
Фото: Алматы әкімдігі
Арықты аршу
Фото: Алматы әкімдігі

Құтқарушылар ауа райының бұзылуына байланысты қала тұрғындары мен қонақтарына тауға шықпауға кеңес берді. Жүргізушілерге ағаштардың құлау және электр желілерінің үзілу қаупіне байланысты автокөлікті жол жиегіне қоймаған абзал.

«Су тасқынының алдын алу үшін қала тұрғындарынан арық пен каналды қоқысқа толтырып, бітеп тастамауды сұраймыз. Құқық бұзушылар ҚР ӘҚБтК-нің 505-бабы бойынша «Қалалар мен елді мекендердің аумақтарын абаттандыру қағидаларын бұзу, сондай-ақ инфрақұрылым нысандарын бұзу, қала мен елді мекендердің жасыл желектерін жою және зақымдау» бойынша әкімшілік жауапкершілікке тартылады», - деп хабарлады әкімдіктен.

Соңғы жаңалықтар