Алматыда өткен жылы 2,5 мыңға жуық отбасы баспаналы болды

2023 жылдың желтоқсан айында «Жұмыс істейтін жастар үшін сатып алу құқығынсыз жалға берілетін тұрғын үй» бағдарламасы аясында Алматының 35 жасқа дейінгі жұмыс істейтін жастарынан өтініш пен құжат қабылдау аяқталды, деп хабарлайды Kazinform.

Аталмыш бағдарлама аясында Наурызбай ауданында 3 жыл мерзімге 2100 пәтер беріледі деп болжанып отыр.

Сондай-ақ Алматы қалалық коммуналдық инфрақұрылымды дамыту басқармасының мәліметінше, өткен жылы 2 454 отбасы баспаналы болды, оның 2 049-ы қолжетімді тұрғын үй бағдарламасы бойынша, 405-і коммуналдық тұрғын үй қорынан үй алды. 

«Алматы қаласының әкімі Ерболат Досаевтың жеке бастамасымен халықтың әлеуметтік осал топтарына (ХӘОТ) 2000 пәтер бөлу туралы шешім қабылданды, оның 20%-ы жетім балаларға бөлінеді. ХӘОТ үшін пәтер бөлу 2024 жылдың көктемінде жоспарланған», - деп хабарлады Алматы әкімдігінің баспасөз қызметі.

Айта кетейік, 2023-2029 жылдарға арналған тұрғын үй-коммуналдық инфрақұрылымды дамыту тұжырымдамасы аясында Алматыда мынадай мемлекеттік бағдарламалар іске асырылып жатыр:

- Жылдық 2% мөлшерлеме бойынша 2-10-20 («Бақытты отбасы»);

- Жылдық 5% мөлшерлеме бойынша 5-10-20 («Шаңырақ»);

- «Алматы жастары» қалалық бағдарламасы.

«Тұрғын үй бағдарламаларының операторы «Отбасы банк» АҚ. Негізгі талаптар: төлем қабілеттілігін растау және тұрғын үй құнының кемінде 10% мөлшерінде бастапқы жарна енгізу. Осы бағдарламалар бойынша тұрғын үйді сату туралы ақпаратпен банктің сайтынан (www.hcsbk.kz және www.otbasybank.kz) танысуға болады», - деп хабарлады әкімдікте.