Алматыда супермаркет алдындағы ауқымды қосалқы нысан бұзылды
АЛМАТЫ. KAZINFORM — Алматыда супермаркетке заңсыз салынған қосымша құрылыс сот шешімімен бұзылды.
Қала құрылысын бақылау басқармасының мәліметінше, Сейфуллин даңғылы, 510А мекенжайындағы «Spar» супермаркетіне жапсарлас салынған нысан толықтай сүрілді.
Бұған дейін жоспардан тыс тексеру барысында басқарма «КБЕ групп» ЖШС-не құрылысқа қажетті рұқсат құжаттарының болмауына байланысты әкімшілік шаралар қолданып, анықталған заң бұзушылықтарды жою туралы нұсқама берген. Тексеру нәтижесінде нұсқаманың орындалмағанына байланысты тиісті материалдар сотқа жолданған.
— Мамандандырылған ауданаралық экономикалық сот басқарманың талап-арызын толық көлемде қанағаттандырды. Нысанды бұзу сот шешімін орындау мақсатында оның иесі тарапынан жүзеге асырылды, — деп хабарлады ведомстводан.
Еске салайық, бұған дейін Алматыда Құрманғазы көшесі, 43 мекенжайындағы дәмхананың қосалқы бөлігі толықтай бұзылды.
