Алматыда Төле би көшесін ұзарту жұмыстары неге тоқтап тұр – әкім жауап берді

АЛМАТЫ. KAZINFORM – Алматы қаласының әкімі Ерболат Досаев Әуезов ауданының тұрғындарымен кездесу өткізді. Жиын барысында қала тұрғыны Төле би көшесін ұзарту жұмыстары туралы сұрақ қойды.

– Төле би көшесін ұзарту жобасы 2 жыл бұрын басталды. Сол кезден бері біз құрылыстың арасында өмір сүріп келеміз. Көпжылдық қарағайлар шабылды, арық жүйесі көміліп қалды. Енді жарты жылдан бері барлық жұмыстар мүлдем тоқтап қалды. Оның себебі неде? - деді Әуезов ауданының тұрғыны.

Алматы әкімі бұл сұрақтағы басты мәселе – жер учаскелерін сатып алу екенін атап өтті.

– Жұмыс бойынша мердігер компания белгіленген, жергілікті бюджетте қаражат бар. Бірақ басты мәселе - жер учаскелерін сатып алу. Барлығы 160 аумақты сатып алуымыз керек еді. Оның 140-ын алып қойдық. Енді қалған жиырмасының біреуімен келісім жасасып жатырмыз, жетеуімен іс сотта. Ал қалған он екісімен сөйлесіп жатырмыз. Менің тәжірибемде жер иелерімен біз ұсынған баға бойынша келіскен жағдай болған емес. Сондықтан сот процесстерінен өтуге мәжбүрміз. Қыркүйек-қазан айларына қарай барлық сот дауларын аяқтап, қалған жер учаскелерін сатып алуға тырысамыз, - деді Ерболат Досаев.