Алматыда турфирма қызметкерін қайшымен жарақаттаған әйел қамауға алынды
Алматыда турфирманың бірінде жанжал шығарып, қызметкерін қайшымен жарақаттаған әйел қамауға алынды, деп хабарлайды Kazinform.
Оқиға бойынша Алмалы аудандық полиция басқармасында тергеу жүріп жатыр. Полицияның мәліметінше, оқиға сотқа дейінгі тергеудің бірыңғай тізіліміне ҚР ҚК-нің 389-бабы 3-бөлігі бойынша тіркелді.
«Күдікті - 1978 жылы туған И. есімді әйел, ҚР Қылмыстық іс жүргізу кодексінің 128-бабына сәйкес уақытша ұстау изоляторына қамалды. Жәбірленушінің алған жарақатының ауырлығын анықтау мақсатында сот-медициналық сараптама тағайындалды. Қылмыстық іс бойынша жүргізілген тергеу шаралары кешенінің қорытындысы бойынша процессуалдық шешім қабылданатын болады», - деді Алматы қалалық полиция департаменті бастығының орынбасары, полиция полковнигі Қайрат Нұрмағамбетов.
Еске салайық Алматыда турфирманың қызметіне шағымданған әйел компания қызметкеріне шабуыл жасаған болатын. Салдарынан жәбірленушінің басына қайшы кіріп кеткен еді.
