Алматыда Ұлы Жеңістің 80 жылдығына арналған дрондар шоуын 60 мың адам тамашалады
АЛМАТЫ. KAZINFORM – Жеңістің 80 жылдығын мерекелеу аясында Абай алаңында дрондар шоуы өтті.
Жеңіс күніне арналған мерекелік іс-шара қала тұрғындары мен қонақтары үшін таңғажайып көрініс ұсынды. Оны 60 мыңға жуық алматылық тамашалады.
Аспанға бір мезетте 500-ден астам дрон ұшып, Жеңіс элементтері мен ел тарихындағы маңызды сәттерді бейнелейтін ерекше бағдарламаны ұсынды.
Қазақстандық батырларға ерекше мән берілді. Аты аңызға айналған Мәншүк Мәметова мен Әлия Молдағұлованың бейнелері аспанда жаңғырып, әрқайсысы өзіне тән болмысымен көрінді: Мәншүк — автоматымен, ал Әлия — мылтығымен.
Әуе кеңістігінде әйгілі ұшқыш Талғат Бигелдинов те көзге түсті.
Ал қолбасшы, жазушы, Халық қаһарманы Бауыржан Момышұлының бейнесі – ерлік пен рухтың символына айналды.
Бұдан бөлек, Ұлы Жеңіске 80 жыл, «Ешкім де, ешқашан да ұмытылмайды!» – «Никто не забыт, ничто не забыто» деген жазу пайда болды. Шоудың шарықтау шегі қазақы оюмен көмкерілген мерекелік композиция және жарқыраған «Жеңіс күні құтты болсын!» деген жазумен аяқталды.
— Бұл заманауи визуалды шоу — батырларға тағзым ғана емес, соғыс туралы жаңа, қолжетімді, әсерлі әрі есте қаларлық баяндау түрі. Ол тарихи жадымызды сақтау мен келер ұрпаққа жеткізудің маңыздылығын еске салады. Іс-шара демеушілердің қолдауымен барлық қауіпсіздік талап сақтала отырып ұйымдастырылды, — деп атап өтті әкімдіктен.
Еске салайық, осыған дейін Алматы аспанында соғыс батырларының бейнесі көрсетілетіні туралы жазған едік.
