Алматыда вакцина алмаған жасөспірімдер жаппай көкжөтел жұқтырып жатыр

АЛМАТЫ. KAZINFORM — Алматы қалалық санитариялық-эпидемиологиялық бақылау департаменті көкжөтел ауруы бойынша қаладағы эпидемиологиялық жағдайды мәлім етті.

Ведомствоның мәліметінше, Алматыда биыл екі айдың ішінде 14 жасқа дейінгі екпе алмаған балалар арасында көкжөтелдің 15 жағдайы расталған.

Ошақтарда байланыста болған 208 адам тексерілді, нәтижесі — теріс.

Байланыста болғандарға емхана медицина қызметкерлері медициналық бақылау жасайды.

Өткен жылы 14 жасқа дейінгі вакцина алмаған балалар арасында көкжөтелдің расталған 5 жағдайы тіркелген.

«Көкжөтелден қорғанудың жалғыз жолы — вакцина алу. 2, 3, 4 және 18 айлық балаларға көкжөтелге, дифтерияға, сіреспеге, „В“ гепатитіне, гемофильді инфекцияға және полиомиелитке қарсы бір мезгілде кешенді вакцина егіледі. Бұдан әрі 6 жастағы балаларға АбКДС күшейткіш дозасы салынады» деп хабарлады қалалық санитариялық-эпидемиологиялық бақылау департаментінің баспасөз қызметі.

Ауру белгілері пайда болған кезде эпидемиологтар мынадай ақыл-кеңес ұсынады:

— уақтылы медициналық көмекке жүгіну, өзін-өзі емдемеу, тек дәрігердің нұсқауы бойынша ем қабылдау;
— бөлмені жиі желдетіп, дымқыл тазалау жүргізу;
— жөтелген кезде ауызды жабу, қолды жиі жуу;
— ата-аналарға науқас балаларды ұйымдасқан ұжымдарға, мектеп пен МДБҰ-ға жібермеу.