Алматыда жекеменшік мектеп жабылып жатыр: оқушылар не істейді
АЛМАТЫ. KAZINFORM – Алматыда жекеменшік мектептің жабылуына байланысты 400-ге жуық оқушы қайда барады? Бұл сұраққа Білім басқармасы жауап берді.
Алатау ауданында Abyroi School жекеменшік мектебінің қызметі тоқтайтыны белгілі болды. Алматы қаласы Білім басқармасының мәліметіне сәйкес, жаңа оқу жылы алдында балаларының мектепсіз қалуына алаңдаған ата-аналар ведомствоға жүгінген. Сондықтан қазір жекеменшік мектеп ғимаратын мемлекеттік меншікке беру мәселесі шешіліп жатыр.
– 2026 жылдың 1 қыркүйегіне дейін балаларды мектептегі орынмен қамту мақсатында аталған ғимаратты жалға алу шарты рәсімделіп жатыр. Бұл ғимарат №209 мемлекеттік мектеп-гимназиясының филиалы ретінде жұмыс істейді. Бұл оқушыларды толық қамтып, оқу процесін штаттық режимде ұйымдастыруға мүмкіндік береді, – деді басқарма өкілдері.
Өткен оқу жылында Abyroi School жекеменшік мектебінде 400-ге жуық оқушы білім алған.
Еске салайық, биыл 22 жекеменшік мектеп лицензиясынан айырылды.
