Алматыда ЖРВИ-мен ауырғандар саны артты

Алматыда өткен аптада ЖРВИ-ді 15 380 адам жұқтырған, бұл өткен жылдың сәйкес кезеңімен салыстарғанда 5,2%-ға (13 984 жағдай) жоғары. Сондай-ақ балалар арасында аурудың таралу деңгейі 44,3%-ды құрады. Бұл туралы Алматы қалалық санитариялық-эпидемиологиялық бақылау департаменті басшысының орынбасары Айгүл Қалықова айтты, деп хабарлайды Kazinform.  

«Өткен жылдың қараша айынан басынан бастап А/H3N2 типті тұмаудың 206 расталған жағдайы тіркелді, барлық науқасқа емдеу тағайындалды, қазір олардың жағдайы қанағаттанарлық. Қалада жіті респираторлық вирустық инфекциялардың басқа вирустары: риновирус, бокавирус, РС вирус, аденовирус, парагрипп, маусымдық коронавирус айналымда жүр», - деді Айгүл Қалықова.

Ол сондай-ақ ЖРВИ, тұмауды алдын алу шараларын сақтауды ұсынды.

«Дәрігердің тағайындауымен иммундық жүйені көтеру керек, яғни, С дәруменін, оксолин жақпа майын қолдану қажет. Жаппай іс-шаралар өтетін орындарға баруды шектеңіз, бөлмелерде ылғалды жинау жүргізіп, желдетіп отыру керек, ЖРВИ-мен ауырған адамдармен қарым-қатынасқа түспеу, қарым-қатынас болған жағдайда бетперде киіп, жеке гигиена ережелерін сақтау қажет. Ауырған жағдайда үйде болған жөн, өзін-өзі емдемей, медицина қызметкерін шақыру қажет, түшкіру, жөтелу кезінде ауызды қолмен, майлықпен, орамалмен жабу керек. Қолды мүмкіндігінше жиі жуу керек. Науқас балаларды мектепке, мектепке дейінгі мекемелерге, мәдени-бұқаралық іс-шаралар өтетін орындарға жібермеген дұрыс», - деді дәрігер.