Алматының денсаулық сақтау инфрақұрылымын жаңартуға 69,4 млрд теңге бөлінеді
АЛМАТЫ. KAZINFORM - 2024 жылы денсаулық сақтау инфрақұрылымын жаңғыртуды қаржыландыру 2,5 есеге артып, 26,3 млрд теңгеге жетті. Бұл туралы Алматы әкімдігі хабарлады.
Алматы әкімдігінің мәліметінше, осы жылдың соңына дейін 2 жаңа емхананың құрылысы мен 5 ірі аурухананы жаңартуға арналған жобалау-сметалық құжаттама дайындалады. Құрылыс-монтаж жұмыстары 2025-2026 жылдары жүргізілетін болады.
Биыл Алматыда екі медициналық-санитариялық алғашқы көмек көрсету орталығы мен 1 емхана, сондай-ақ Балалар шұғыл медициналық көмек орталығының жаңа корпусы ашылды.
Бұдан бөлек, қалалық жұмыспен қамту және әлеуметтік бағдарламалар басқармасы жанынан Ерте араласу орталығы құрылды.
Енгізілген ерте араласу үлгісі баланың дамуындағы ауытқушылықтарды ерте анықтау және бағалау, баланың ата-анасын қолдау, көрсетілетін қызметтерді үйлестіру, баланың үлгерімін үнемі қадағалау арқылы үздіксіз бағалау және бақылау принциптеріне негізделген. Бағдарламаның бірегейлігі – бала дүниеге келген кезінен бастап үш жасқа дейінгі физикалық, когнитивті, эмоционалды және әлеуметтік даму үшін маңызды кезеңді қамтиды.
Айта кетерлігі, 2024 жылы денсаулық сақтау инфрақұрылымын жаңғыртуды қаржыландыру 2,5 есеге артып, 26,3 млрд теңгеге жетті. 2025 жылы тағы 2,6 есеге өсіп, 69,4 млрд теңгеге дейін ұлғайтылмақ.
