Алматының ортасында пәтер отқа оранды
АЛМАТЫ. KAZINFORM – Алматыда отқа оранған пәтердің видеосы желіге шықты.
Алматы қалалық ТЖД-ның мәліметінше, 14 наурыз күні сағат 20:24-те өрт сөндірушілер жоғары дәрежедегі шақырту бойынша Бостандық ауданы, Байтұрсынов көшесі, 98 мекенжайына жіберілді.
«№ 1 мамандандырылған өрт сөндіру бөлімінің өрт сөндірушілері сағат 20:32-де жеткен сәтте екі қабатты ғимараттың 2-ші қабаттағы пәтердің өртенгені анықталды. Өрттің жалпы ауданы 200 шаршы метрді құрады. Газ-түтіннен қорғау қызметінің буындары адамдардың болуына барлау жүргізіп, өртті сөндіруге және жапсарлас бөлмелерді қорғау үшін өрт оқпандарын дереу енгізіліп, өрт автоцистерналары су көздеріне жедел орнатылды, судың үздіксіз берілуі қамтамасыз етілді», - деп хабарлады ТЖД-да.
Өрт сағат 21:43-те оқшауланып, сағат 22:21-де толық сөндірілді.
Өрттің екінші қабатта орналасқан көрші пәтерлер мен кеңсе үй-жайларына таралуына жол берілген жоқ.
