«Алматы - Астана - Қазан» теміржол қатынасын ашу ұсынылды
АСТАНА. ҚазАқпарат - Қазақстанның Татарлар және башқұрттар конгресі «Алматы - Астана - Қазан» жаңа теміржол қатынасын ашуды ұсынды. Бастама жайлы Татарстан президенті Рустам Минниханов пен Қостанай облысының әкімі Архимед Мухамбетовтің кездесуі барысында белгілі болды, деп хабарлады «ҚазАқпарат» ХАА тілшісі.
«Кезінде Қазақстанның Татарлар және башқұрттар қауымдастығы мемлекеттік органдар мен авиакомпанияларға «Астана-Қазан-Астана» және «Алматы-Қазан-Алматы» авиарейстерін ашу туралы тиісті өтінішпен шыққан болатын. Бүгін, интеграциялық байланыстардың дамуы мен халықтың өтініштерін ескере отырып, күн тәртібіне «Алматы-Астана-Қазан» маршруты бойынша тіркемелі вагон бөлу мәселесі шығарылды», - деді конгресс басшысы Тауфиқ Кәрімов.
Сондай-ақ Татарстан Президентіне Қазақстандағы татар және татар-башқұрт этномәдени ұйымдарының жұмысы жайлы әңгімелене келе, екі республика арасындағы іскерлік байланыстарды нығайту бойынша бірқатар бастамалар жеткізілді.
