Алматы әуежайында сөмкесіне оқ-дәрі салып алған екі шетелдік ұсталды
АЛМАТЫ. ҚазАқпарат – 28 қыркүйекте көліктегі полиция қызметкерлері 64 жастағы ер адам мен 43 жастағы әйелді ұстады. Екеуі де - Германия азаматы, Қазақстанға «Алматы-Франкфурт» әуе рейсімен ұшып келген, деп хабарлайды ҚазАқпарат көліктегі полиция департаментінің баспасөз қызметіне сілтеме жасап.
Тексеру кезінде олардан 30-06 мм және 300 мм калибрлі патрондар табылды.
«Полицияның желілік бөлімінің қызметкерлері Алматы қаласының әуежайында ұсталғандарға қатысты ҚР ӘҚБтК-нің 484-бабының 1-тармағы бойынша әкімшілік хаттама жасады. Әрқайсысына 10 АЕК (29170 тг) мөлшерінде әкімшілік айыппұл салынды», - деп хабарлады көліктегі ПД баспасөз қызметі.
Сонымен қатар, сол күні Алматы қаласының әуежайында 1979 жылы туған Алматы облысының тұрғыны ұсталды.
Ол Нұр-Сұлтан қаласына ұшып бара жатқан әуе кемесінің бортына электр есеңгіреткішпен кіруге тырысқан.
Аталған факті бойынша ҚР ӘҚБтК-нің 482-бабының 1-тармағы бойынша әкімшілік хаттама толтырылды.
Қазіргі уақытта тәркіленген зат бойынша сот-электротехникалық сараптама тағайындалды.
