Алматы іргесіндегі Тұздыбастау ауылында балон жарылып, анасы мен ұлы ауруханаға түсті
ҚОНАЕВ. ҚазАқпарат – Алматы қаласының іргесінде орналасқан Тұздыбастау ауылында газ балоны жарылып, анасы мен ұлы ауруханаға түсті, деп хабарлайды ҚазАқпарат Алматы облысы ТЖД баспасөз қызметіне сілтеме жасап.
«2 тамыз сағат 18:07-де Алматы облысы Төтенше жағдайлар департаментіне алдын ала мәлімет бойынша Талғар ауданының Тұздыбастау ауылында Достық көшесіндегі жеке тұрғын үйде тұтанусыз газ-ауа қоспасының тарсылы болғаны туралы хабарлама түсті.
Оқиға орнына дереу Алматы облысы ТЖД қызметкерлері жіберілді.
Осы үйден 2 адам: 1981 жылы туған әйел (3 дәрежелі күйік, жағдайы ауыр) және 2001 жылы туған ұлы (2 дәрежелі күйік, жағдайы ауырлығы орташа дәрежеде) облыстық ауруханаға жатқызылды.
Оқиғаның мән-жайы мен себебі анықталып жатыр», - делінген хабарламада.
