Алматы кедендік рәсімдеу орталығында тіркелген импорттық тауарлардың 24 пайызы - ресейлік өнімдер

АЛМАТЫ. Наурыздың 13-і. ҚазАқпарат /Ерлік Ержанұлы/ - Алматы кедендік рәсімдеу орталығында тіркелген импорттық тауарлардың 24 пайызы - ресейлік өнімдер.

Бұл жайлы бүгін, ҚР Қаржы министрі Болат Жәмішевтің Алматы кедендік рәсімдеу орталығының жұмысымен танысуы кезінде айтылды, деп хабарлайды ҚазАқпарат. Алматы кедендік рәсімдеу орталығында өткен жылы жалпы құны 5 491 650 доллар болатын 2 385 649 тонна жүк айналымы тіркелген болатын. Оның 2 052 628 тоннасын -импорт, ал 333 011 тоннасын экспорттық тауарлар құрады. «Импорттық тауарлардың 24 пайызы (1 101 580 мың доллар) - ресейдің, 20 пайызы (913 миллион 394 мың доллар) - еуроодақ елдерінің, 16 пайызы (758 миллион 484 мың доллар) қытайдың өнімдері болды», - дейді Алматы кедендік рәсімдеу орталығының бастығы Нұрлан Мұсабеков. Оның айтуынша, орталықта тіркелген импорттық тауарлардың 18 пайызын - өнеркәсіп құралдары, 13 пайызын электр машиналары мен жабдықтар құрайды. Пластмасса өнімдері, құрылысқа пайдаланылатын темір материалдарының үлесі - 5, қағаз бен картон, қара металл өнімдері және косметикалық бұйымдардың үлесі - 4, жиһаз, дәрі-дәрмек, приборлар мен құралдардың үлесі 3 пайыздан болып отыр. Ал бұдан өзге тауарлардың жалпы үлесі 38 пайызды құраған.