Алматы-Қорғас тасжолында жеңіл автокөлік тиеген жүк көліктері соқтығысты

АЛМАТЫ. ҚазАқпарат - Алматы облысындағы тасжолда ірі көлік апаты болды, деп хабарлайды ҚазАқпарат тілшісі.

Әлеуметтік желіде «Алматы-Қорғас» тасжолында болған ірі жол апатының видеосы пайда болды.
Бейнежазбадан аударылып қалған жүк тиелген тіркеме мен қираған көліктерді байқауға болады.
Алматы облыстық Полиция департаменті мәлім еткендей, жол апаты 26 ақпан күні сағат 11:00-де Алматы-Шелек-Қорғас тасжолының 42-шақырымында болды.
Алдын ала мәлімет бойынша, 40 жастағы жүргізуші тізгіндеген MAN жүк көлігінің артқы жартылай тіркемесі шығып кетіп, DAF автотасығышына соғылып, соққы инерциясынан ол Mercedes-Benz автотасымалдаушысымен соқтығысқан.
MAN жүк көлігі бүйіріне аударылып қалған. Апат салдарынан автокөлік тасымалдаушы жүк көлігіне тиелген көліктер зақымдалған. Құрбандар мен зардап шеккендер жоқ.

Полицейлер жол-көлік оқиғасы бойынша ҚР ӘҚБтК-нің 610-бабының 2-бөлігі «Адамдардың денсаулығына, көлік құралдарының немесе өзге де мүліктің зақымдалуына әкеп соққан жол қозғалысы ережелерін бұзу» бойынша тергеу жүргізіп жатыр.