Алматы метросы жолаушының өтінішін ескеріп, жұмыс уақытын өзгертті
АЛМАТЫ. ҚазАқпарат - Алматы метросы бұдын былай 10 минутқа ерте ашылатын болады. Бұл туралы ҚазАқпарат тілшісіне «Метрополитен» МКК Айгүл Ешмағанбетова айтты.
«Мамырдан бастап жерасты көлігінің жұмыс кестесі өзгерді. Бірінші пойыз 6.20-да келетін болды. Бұған дейін метро таңғы сағат 6.30-да ашылатын болған. Бұл өзгерістің пойыздардың жүру кестесіне қатысы болмайды», - деді ол.
Оның айтуынша, бұған бір жолаушының метрополитен сайтына жазған өтініші себепкер болған.
«Жолаушы 6.30-да метроға кірген соң, билет алып, жүрдек баспалдақпен түскенше біраз уақытын жоғалтып, 6.34-те аттанатын пойыздан үнемі кешігіп қалатынын жеткізген еді. Ол кісінің өтінішіне орай біз метроның ашылу уақытын өзгерттік. Енді жолаушылар метроға асықпай келіп, пойыздарына асықпай жайғаса алады», - деді А.Ешмағанбетова.
