Алматы облыстық полиция шенеунігі тергеуге ілікті ме – Бас прокуратура жауабы
АСТАНА. ҚазАқпарат – ҚР Бас прокуратурасы Алматы облыстық полиция департаменті бастығының орынбасары Рустам Абдрахманов тергеуге алынуы туралы ақпаратқа түсініктеме берді, деп хабарлайды ҚазАқпарат тілшісі.
«Қазіргі уақытта Рүстем Әбідірахманов орнында, қызметінен шеттетілген жоқ. Ол рейдерлік іске қатысты куәгер саналады және куәгерлердің қатарында. Күдікке іліккен жоқ. Одан жауап алынды, тергеу іс-шаралары жүргізілді», - деді ҚР Бас прокуратурасы Қылмыстық қудалау қызметінің бастығы Елдос Сағиев ведомствоның биылғы жұмысын қорытындылауға арналған баспасөз мәслихатында БАҚ өкілдерінің сауалына орай.
Сонымен қатар Бас прокуратура өкілі оған қатысты тінту іс-шараларының жүргізілмегендігін, ұялы телефоны тәркіленбегендігін атап өтті.
Еске салсақ, бұған дейін Алматы облысының полиция департамент бастығының орынбасары Рустам Абдрахмановтан жауап алынғаны туралы хабарланды.
