Алматы облысы: Көктал өзенінің 7 нүктесінде қар көшкіні болған
НҰР-СҰЛТАН. ҚазАқпарат - Алматы облысы бойынша төтенше жағдайлар департаменті Жетісу Алатауы тауларындағы Қора, Көксу, Қорғас өзендерінің бастауларында орналасқан мұздықтарға аэровизуалды шолу жүргізді, деп хабарлайды ҚазАқпарат.
Департаменттің баспасөз қызметінің хабарлауынша, көшкін қаупі бар және мореналық көлдердің жай-күйін тексеру мақсатындағы бұл шара «Қазселденқорғау» мекемесінің «Жетісу Алатауы өңірлік пайдалану басқармасы» филиалымен бірлесіп бірлесіп ұйымдастырылған. Аэровизуалды шолу Талдықорған қаласының әуежайынан еурокоптер - ЕС145 тікұшағымен жүргізілген.
«Бүгінгі таңда 2 500 метрден астам биіктіктегі таулардың оңтүстік беткейлеріндегі қардың қалыңдығы 30-40 см екен. Ал солтүстік жағында 1 метрден 1,5 метрге дейін жетеді. Панфилов ауданы аумағындағы қардың қалыңдығы жылдық нормадан аз, су өтімдері таза, транзиттік түрде екені анықталды. Ауа температурасы 2 500 метр биіктікте +3,5 градус болса, 3 400 метрде +1 болып тұр, 3 800 метрде 0-ден 5 градус төмен», - делінген хабарламада.
Онда қазір гидрологиялық жағдай қалыпты екені де жазылған. Сондай-ақ Кербұлақ ауданы мен Көктал өзені арнасының 7 нүктесінде қар көшкіні түсу деректері тіркелген. Алайда, елді мекендерге қауіп жоқ.
