Алматы облысында 100-ден астам қару иесі жауапқа тартылды
ТАЛДЫҚОРҒАН. ҚазАқпарат - Алматы облысының тәртіп сақшылары қару-жарақ айналымына бақылауды күшейтті. Қазір өңірде «Қару» жедел шарасы жүріп жатыр. Бірнеше тәулік ішінде 100-ден астам қару иесі жауапкершілікке тартылды, деп хабарлайды ҚазАқпарат тілшісі.
Шараның алғашқы күнінде әр түрлі қаруы бар 1701 азамат тексерілді. 115 қару иесінің лицензиясы мен рұқсат құжаттары дұрыс болмай шықты. Қару-жарақты заңсыз сақтаудың 6 фактісі анықталып, оның екі жағдайында, яғни Қарасай ауданы мен Қапшағай қаласында қылмыстық іс қозғалды.
Қару сақтаудың тәртібіне мән бермей ереже бұзған 111 азамат әкімшілік жауапкершілікке тартылып, оларға 3 млн теңгеден астам айыппұл салынды.
Полиция қызметкерлері байланыссыз қалған 15 қару иесінің мекен-жайын нақтылады.
«Қару» алдын алу шарасының қанша күнге жалғасатыны әлі белгісіз.
