Алматы облысында 3 жасар баланы қорлаған күтуші әйелге үкім шықты
ТАЛДЫҚОРҒАН. ҚазАқпарат - Алматы облысының Талғар ауданында үш жасар баланы азаптаған күтуші әйелге үкім шықты, деп хабарлайды ҚазАқпарат тілшісі.
Жергілікті тұрғындардың үйіне күтуші болып жұмысқа орналасқан келіншек үш жасар баламен жалғыз қалған кезде оған айғайлаған, ұрып-соққан. Ол туралы баланың әке-шешесі үйге орнатылған бейнебақылау камерасынан білген.
«Айыпталушы өз айыбын мойындады. Ол сот шешімімен ҚР ҚК 110-бабы, 2-бөлігі, 1-тармағына («Көрінеу кәмелетке толмаған адамға қатысты ұдайы ұрып-соғу немесе өзге де күш қолдану әрекеттері») сәйкес, үш жылға бас бостандығынан айыру жазасына кесілді», - делінген үкімде.
Облыстық сот өкілдерінің айтуынша, ол жазасын қылмыстық-атқару жүйесінің орташа қауіпсіз мекемесінде өтейді.
