Алматы облысында 49 мың бала бірінші сыныпқа барды
«Қымбатты оқушылар, құрметті ұстаздар мен ата-аналар! Сіздерді шын жүректен Білім күнімен және жаңа оқу жылының басталуымен құттықтаймын. Мемлекет қолдауының арқасында тек биылғы жылдың өзінде облысымыз бойынша 35 жаңа мектеп пайдалануға берілмек. Ал олардың 24-і осы күні аудан-қалаларымызда алғашқы оқушыларына өз есіктерін ашты. Биылғы жылы алғаш рет мектеп табалдырығын 49 000 бүлдіршінің аттағаны да баршамыз үшін айтулы жаңалық. Осы балалардың барлығы және өздеріңіз де оқуда озат, шараларға қатысуда белсенді, алғыр әрі тәртіпті болатындықтарыңызға сенім білдіремін. Табыстың кілті білімде екендігін естеріңізден шығармаңыздар. Баршаңызға бар жақсылық пен сәттілік тілеймін», - деді облыс әкімінің орынбасары Ж.Омар.
Салтанатты жиын аяқталғаннан кейін Жақсылық Омар мектептің ішкі құрылымымен танысып, асханасы мен акт залын аралап шықты. Еркіндегі бұл мектеп өткен жылы күрделі жөндеуден өткен болатын. Осыдан кейін өңір басшысының орынбасары Талдықорғандағы гуманитарлық-техникалық колледж студенттерін оқу жылының басталуымен құттықтап қайтты.
Естеріңізге салар болсақ, Білім күніне орай облыстың халқы тығыз орналасқан Қарасай, Жамбыл, Іле, Талғар, Еңбекшіқазақ, Панфилов және Райымбек аудандарында жалпы саны 24 жаңа мектеп пайдалануға берілді. Олардың екеуі күні кеше Жамбыл және Қарасай аудандарында берілген болса, қалған 22-сі бүгін ашылды.