Алматы облысында денсаулық сақтау саласының бюджеті 80 млрд теңгеден асты
ТАЛДЫҚОРҒАН. ҚазАқпарат - 2016 жылы Алматы облысында денсаулық сақтау саласын қаржыландыру 80,9 млрд теңгеден асты. Бұл жөнінде өңір басшысының ресми сайтында жарияланды деп, хабарлайды ҚазАқпарат тілшісі.
Облыстың медициналық мекемелерінің материалдық-техникалық базасын нығайтуға 2,5 млрд теңге бөлінді.
123 бірлік медициналық құрал-жабдықтар мен 35 бірлік санитарлық автокөлік сатып алынды. Нәтижесінде облыстың медициналық мекемелері санитарлық автокөлікпен орташа есеппен 87,3% қамтамасыз етілді. Медициналық құрал-жабдықтармен және медициналық бағыттағы бұйымдармен жарақтандырылу деңгейі 81 %-ды құрайды.
Нәтижесінде, облыс халқының орташа өмір сүру ұзақтығы 72 жасқа жуықтады. 2015 жылмен салыстырғанда ана өлімі 25,5%-ға, нәрестелердің шетінеуі - 4,2-ге, қан айналымы жүйесінің ауруларынан қайтыс болу - 20,6-ға, қатерлі ісіктерден адам өлімі 5,7%-ға төмендеді.
Облыста 826 денсаулық сақтау мекемелері бар. Оның ішінде 663-і - мемлекеттік, 163-і - жекеменшік. Мемлекеттік ұйымдарда 4 867 дәрігер мен 13 765 медбике жұмыс істейді. Былтыр Талдықорған қаласында 300 орынды қалалық көпсалалы аурухана және Алакөл ауданының Ақши ауылында дәрігерлік амбулатория салынды. 14 нысанға күрделі жөндеу жүргізілді.
