Алматы облысында ішімдік тұтыну көрсеткіші 73% төмендеген
Алматы облысының тәртіп сақшылары таратқан ақпаратқа сәйкес, 2020 жылдың төрт айының қорытындысы бойынша қоғамдық орында ішімдік ішудің немесе масаң күйде келудің 900-ден астам дерегі тіркелген. Былтырғы жылдың осы кезеңімен салыстырғанда бұл көрсеткіш 73 пайызға төмендеген.
«Биыл облыс аумағында қоғамдық орындарда масаң күйде жүру дерегі бойынша әкімшілік хаттамалар толтырылып, 926 тұлға жауапқа тартылды. Тәртіп сақшыларының алдын алу бойынша жүргізген жұмыстарының арқасында бұл көрсеткіш өткен жылмен салыстырғанда әлдеқайда төмендеді. Құқық бұзушылыққа жол берген азаматтарға бес айлық есептік көрсеткіш мөлшерінде айыппұл салынды», - деп мәлімеді облыстық ПД баспасөз қызметінен.
Сонымен қатар, қоғамдық орындарда темекi бұйымдарын тұтыну деректері де былтырғы жылғы көрсеткішпен салыстарғанда екі есе азайған.
«Жол сақшылары жолдың қауіпсіздігін қамтамасыз ету барысында жыл басынан бері 109 жүргізушінің масаң күйде көлік басқарғанын анықтады. Аталған деректер бойынша тиісті хаттамалар толтырылып, соттың шешімі бойынша жүргізушілер көлік басқару құқығынан айырылды. Бұл көрсеткіш былтырғы жылмен салыстырғанда 36 пайызға төмен»,- деп толықтырды аталған ведомствоның өкілдері.
Өз кезегінде, облыстық полицейлер қоғамдық орындарда және көлік басқарғанда ішімдік ішудің өте қайғылы жағдайларға әкелетінін ескертеді.