Алматы облысында қысқа мерзімдік курстар үшін оқыту орталықтары белгіленді
АСТАНА. ҚазАқпарат - «Нәтижелі жұмыспен қамтуды және жаппай кәсіпкерлікті дамыту» мемлекеттік бағдарламасы шеңберінде Алматы облысында биылғы жылдың сәуір айынан бері 4 275 жұмыссыз азамат қысқа мерзімдік оқытуға жіберілді, деп хабарлайды Алматы облысы әкімінің баспасөз қызметі.
Бүгінгі таңда 1 730 адам оқуды аяқтап, соның 741-і жұмысқа орналастырылған.
Облыстық жұмыспен қамтуды үйлестіру және әлеуметтік бағдарламалар басқармасының мәліметіне сүйенсек, қазіргі кезде Кәсіпкерлер палатасымен бірлесіп, жұмыссыз азаматтарға қысқа мерзімді курстарды кәсіпорындар жанындағы оқу орталықтарының базасында ұйымдастыру жүйесі енгізілуде. Бұл мақсатта 5 оқу орталығы іріктеліп алынды. Атап айтқанда, Талдықорған қаласында «ТАТЭК» АҚ, «Қайнар» ЖШС, «Байтұрғанов» ЖК, Қапшағай қаласында «КНАУФ Гипс Қапшағай» ЖШС, Талғар ауданында «Байсерке Агро» ЖШС.
Аталмыш өндірістік базаларда курс тыңдаушылары электромонтер, электрслесарь, аккумуляторшы, ірі қараны қолдан ұрықтандыру технигі, нэйл стилист, визажист, шаштараз кәсіптері бойынша тәжірибелерін шыңдайды.
Биылғы жылы осы оқу орталықтарында 200 адамға оқыту курсы ұйымдастырылмақ. Бүгінгі күні жергілікті жерлердегі жұмыспен қамту орталықтары тарапынан аталмыш мамандықтарға оқытуға деген жұмыс берушілердің сұраныс деңгейі анықталуда.
