Алматы облысында жамбылдық 54 жастағы тұрғын есірткімен ұсталды
ТАЛДЫҚОРҒАН. ҚазАқпарат - Алматы облысында Жамбыл облысының 54 жастағы тұрғыны есірткімен ұсталды, деп хабарлайды «ҚазАқпарат» ХАА тілшісі.
Ол Жамбыл ауданы «Ақтерек» бақылау бекетінде ұсталды. Тексеру барысында иісшіл иттің көмегімен Ниссан-цефиро автокөлігінің жүксалу бөлігінде іші ақшыл сары ұнтақ тәріздес затқа толы пластмассалық бөтелке табылған. Сот-химиялық сараптама нәтижесі бойынша тәркіленген заттың салмағы 1 килограмм 10,8 грамм «Героин» екендігі анықталды.
Аталған факті бойынша Қазақстан Республикасы Қылмыстық Кодексінің 297-бабына сәйкес қылмыстық іс қозғалды (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу).
Ұсталған азамат Қарасай АІІБ-на уақытша ұстау изоляторына қамауға алынды. Қазіргі уақытта тексеру жұмыстары жүргізілуде.
Жалпы, ағымдағы жылы заңсыз айналымнан Алматы облысы ІІД қызметкерлерімен 4 кг 681,15 гр.героин тәркіленді.
