Алматы облысында жолаушылар тасымалдаушы 11 пойыз кестелерінен кешігуде
АСТАНА. 24 маусым. ҚазАқпарат /Гүлмира Әлиакпарова/ - Алматы облысында жүк пойызының болат жолдан шығып кетуінен жолаушылар тасымалдаушы 11 пойыз қозғалыстарын тоқтатты.
Бұл туралы «Қазақстан темір жолы» компаниясының баспасөз қызметінен хабарлады.
Мәлім болғандай, 24 маусым күні түнгі сағат 1-ден 45 минут кеткенде Алматы-Отар учаскісінде №3401-ші жүк пойызының тіркемесіндегі №28043701-ші вагонның бүйір рамасының бұзылуынан 9 вагон темір жолдан шығып кеткен. ҚТЖ-дан анықтағандай, вагондар 2010 жылы Алтай вагон құрастыру зауытында шығарылған.
«Зардап шеккендер жоқ. 460 метр жол зақымдалды. Қазір қалпына келтіру жұмыстары жүргізілуде. Қазіргі уақытта жолаушыларды тасымалдаушы 11 пойыз кідіріп тұр», - делінген таратылған хабарламада.
