Алматы тұрғыны пәтер жалдап, оны есірткі жасайтын зертханаға айналдырған
Полиция департаментінің мәліметінше, заңсыз кәсіпті 27 жастағы алматылық ұйымдастырған.
Ол көрші үйден пәтер жалдап, синтетикалық есірткіні сол жерде дайындаған.
«Арнайы іс-шараны біздің бөлімнің қызметкерлері қызметтік-іздестіру итпен бірге өткізді. Ш. есімді азаматтың негізгі тұрғылықты жерінің жанында орналасқан жалдамалы пәтерін тінту кезінде «мефедрон» синтетикалық есірткісін өндіруге арналған компоненттер мен жабдықтар тәркіленді. Сот-химиялық сараптама тәркіленген заттардың психоактивті заттарға жататынын растады», – дейді Алматы қалалық полиция департаменті есірткі қылмысына қарсы күрес басқармасының бастығы Ерлан Алмағамбетов.
Күдікті қылмыстық жауапкершілікке тартылып, полиция департаметінің уақытша ұстау изоляторына қамалды.
Сотқа дейінгі тергеу жүріп жатыр.